KLEINMOND – Mense van regoor die land stroom op die oomblik na die Overstrand en daar is waglyste van kopers in sekere prysklasse. So sê Dean Meijer, eienaar van die Chas Everitt eiendomsagentskap op Hermanus. Meijer sê sy Kleinmond agentskap alleen het die afgelope jaar sowat 60 eiendomme verkoop. Pam Golding op Kleinmond se Lise Götz bevestig dat 2021 ‘n buitengewoon goeie jaar vir die eiendomsmark op Kleinmond was. Sy raam die totale waarde van eiendomstransaksies op Kleinmond tot dusver vanjaar op nagenoeg R245m (Okt. 2020 tot Okt. 2021).
Wat is die redes vir hierdie opbloei in die plaaslike eiendomsmark? Meijer skryf dit hoofsaaklik toe aan twee faktore. Die eerste is Covid. Die pandemie het mense gedwing om van hul huise af te werk en baie is net nooit terug kantoor toe nie. Baie Kapenaars het in die stad gewoon juis om naby aan hul kantore te wees. Toe hulle van die huis af begin werk, het die vraag gou begin opduik: As ek in elk geval van die huis af werk, kan dit mos net sowel van enige plek wees. Ons hoef nie in die stad te bly nie. Hierdie wending, tesame met die uitbreiding van vesel internetverbindings op Kleinmond, sê Meijer is die grootste enkele dryfveer vir eiendomsverkope in die Overstrand. Dié seining word onderskryf deur ander eiendomsagente op Kleinmond, soos SEEFF se Mike Triblehorn. Hy reken tussen 30% en 40% van Kleinmond kopers is tans afkomstig vanuit Kaapstad.
Meijer sê die tweede en belangrike rede vir die toeloop van kopers na ons streek is goeie munisipale dienste. ”Mense soek stabiele plaaslike regerings”. Dienslewering in baie dorpe in ons noordelike provinsies het in duie gestort of is in die proses om in duie te stort. “Ek het die annerdag met ‘n vriend van my in Bloemfontein gepraat. Hy sê daar is feitlik geen dienslewering meer nie. Jy betaal jou munisipale rekening en moet dan privaat maatskappye betaal om te doen wat die munisipaliteit eintlik behoort te doen”. Meijer sê die situasie het vir baie mense net onhoudbaar geword en daar is nou ‘n natuurlike migrasie na gebiede soos die Overstrand, waar daar steeds doeltreffende plaaslike regerings in plek is.
Meijer sê daar is letterlik ‘n waglys van mense op Kleinmond wat eiendomme soek in die prysklas van R1,5 tot R2m. Daar is egter doodgewoon net nie meer nie voorraad in hierdie prysklas nie. Volgens Meijer is die gemiddelde koopprys van eiendomme op Kleinmond (dit sluit erwe in) tans R2,1. As ‘n huis in ‘n billike toestand en reggeprys is, verkoop hy dadelik, sê Meijer. In sommige gevalle kry ons letterlik nie eers kans om die huise behoorlik op ons boeke te sit nie. Daar is ‘n waglys van mense.
Meijer sê Kleinmond lok al meer gesinne en permanente inwoners. Hulle is hoofsaaklik Afrikaansprekend.
