KLEINMOND – Plaaslike inwoners het net in die afgelope twee weke meer as R200 000 aan internet bedrieërs oorbetaal. Dit is geld wat die inwoners in alle waarskynlikheid nooit weer sal sien nie.
Intussen sit plaaslike speurders met hul hande in hul hare om die skuldiges te probeer opspoor. Dit is ‘n bykans onmoontlike taak en bitter min van hierdie sake eindig uiteindelik in die hof.
Daar is na wat ons verneem net in die laaste twee weke nege bedrogklagtes by die Kleinmond polisiestasie gelê. Saam beloop die bedrae wat gesteel is, meer as R200 000. Dit is net in die Hangklip/Kleinmond gebied. Daar is sonder twyfel nog ander mense wat geld verloor het, maar besluit het om dit nie aan te meld nie. Dink net wat maak hierdie skelms op ‘n dag as hulle landwyd bedrywig is. Dit is ‘n multi-miljoen rand besigheid wat net meer en meer gesofistikeerd raak.
Die slenters waarmee die bedrieërs mense vang is, met die uitsondering van een of twee, meesal ou bekendes. ‘n Mens wil amper sê oud en afgeleef, maar daar is duidelik mense wat nog nie van hulle gehoor het nie. Hier is ‘n paar voorbeelde.
Die bank bel jou en vertel jou hulle vermoed daar was ‘n bedrieglike transaksie op jou rekening. Hulle wil dit regstel en vra jou bankbesonderhede. (MOET ONDER GEEN OMSTANDIGHEDE OOIT U BANKBESONDERHEDE AAN IEMAND OOR DIE TELEFOON VERSKAF NIE. VERAL NIE JOU PIN NOMMER EN SEKURITEITSKODE NIE – as hulle dit het, kan hulle met jou geld maak soos hulle wil). Die skelms gaan selfs sover om vir jou te vertel wat jou laaste drie transaksies was. Dit dui daarop dat daar waarskynlik iemand in die bank met hulle saamwerk. Red: Ek dink ons banke het waarskynlik ‘n baie groter probleem as wat selfs hulle dink. Die skelms vertel jou om jou foon af te sit en dit dan weer aan te sit. Binne minute is jou rekening leeggetrek. In een so geval die laaste 14 dae het ‘n Kleinmonder sowat R12 000 verloor.
Kyk ook uit vir die nuwe slenter op Faceboek. In een geval het die bedrieërs ‘n advertensie omskep om te lyk asof dit van Takealot af kom. Die meeste mense ken teen hierdie tyd vir Takealot en vertrou die maatskappy. Volgens die advertensies kan jy vir ‘n beperkte tyd ‘n grootskerm televisie of stofsuier of wat ook al koop vir net R60. Ja, net R60. Wat die skelms gedoen het, is om ‘n kloon van ‘n aanlynwinkel te skep. Omdat hulle in beheer van die aanlynwinkel is, het hulle ook beheer oor die kommentare. Dit lyk of mense tevrede is met hulle aankope en die goedere ontvang het. Dit is egter nie waar nie. Dis meesal vals profiele: mense wat nie bestaan nie. As jy aandui dat jy belangstel, word jy ‘n toepaslike vragie of twee gevra en dan speel jy ‘n speletjie om te sien of jy ‘n wenner is. Glo my, jy is altyd ‘n wenner. Nou, terwyl jy opgewonde is oor jou wenslag, neem hulle jou na die bladsy waar jy moet betaal. Hier moet jy al jou bankbesonderhede gee. Jy betaal en kry selfs kennisgewing van aflewering. Wat jy ook al gekoop het, gaan jy nooit sien nie. Ons weet van R3500 wat die afgelope twee weke op hierdie wyse gesteel is. Dit is waarskynlik veel meer.
Dan is daar natuurlik die skelms se ou gunsteling – kar koop oor die internet. Mense sien ‘n kar wat skynbaar deur ‘n handelaar op Faceboek, Gumtree, OLX of derglike webtuistes te koop aangebied word. Hulle bel en die skelms help al te gretig. Hulle vertel daar is ongelukkig koste betrokke soos die registrasie van die voertuig, die man wat dit moet aflewer ens. In twee afsonderlike gevalle het dié skelmstreek Kleinmonders R60 000 en R25 000 gekos in net die afgelope twee weke.
Nog ‘n slenter is faktuurbedrog. Volgens die polisie onderskep die bedrieërs die e-posadresse van besighede. Jy dink jy betaal die besigheid terwyl die skelm sit en wag vir jou geld. Maak altyd seker dat die faktuur en die bankbesonderhede ooreenstem en korrek is. ‘n Kleinmonder het die afgelope maand R80 000 op hierdie wyse verloor.
Die kersie op die koek en die een wat ‘n mens nou werklik gedink het waarvoor mense nie meer gaan val nie, is die lotery-gedoente. In ‘n onlangse voorval stuur ‘n vriend van iemand op die dorp glo die goeie nuus aan. Jy het die een of ander lotery gewen en R950 000 gewen. Die geld is joue maar …. daar is natuurlik ‘n paar duisend rand administrasiegeld om die geld by jou uit te kry. Toe die skelms sien die person word meegesleur, kom hulle met die volgende plan: As jy nog R7 000 betaal, betaal ons jou R1,5m. Die persoon betaal uiteindelik R20 000 oor en sit nou met niks.
As dit te goed is om waar te wees, dan is dit in alle waarskynlikheid te goed om waar te wees
