Die nasionale sensus het gister, Woensdag 2 Februarie begin en duur tot 28 Februarie. Dis die vierde sensus sedert 1994. Vir die eerste keer kan Suid-Afrikaners nou die sensus ook aanlyn invul, maar hulle moes reeds daarvoor geregistreer het. Diegene wat nie geregistreer is nie, kan wel telefonies gehelp word of wag vir die sensuswerkers wat van deur tot deur hul inligting sal kom haal.
Indien mense ongemaklik voel om die werkers aan huis te ontvang, kan hulle reël om die werkers by ‘n openbare plek te ontmoet.
Die werkers kan uitgeken word aan hul swart pet met Sensus 2022 in groen daarop gedruk, ‘n heldergroen hemp en ‘n swart sak – ook met groen drukwerk.
Intussen het verskeie politieke partye en groepe ‘n oproep tot ‘n burgerlike verset-aksie gedoen. Hulle betoog dat die afdeling vir rasseklassifikasie ongrondwetlik is en beveel aan dat mense onder die afdeling ‘ander ras’ die woord Afrikaan moet invul. Hulle moet egter hul huistaal duidelik aandui.
