KLEINMOND – Buitelug-markte wat met groot entoesiasme in die somer begin word, loop keer op keer in die winter dood vanweë die onvoorspelbaarheid van ons weer.
Nydia Carelse kom nou met ‘n oplossing vir die probleem: ‘n voltydse winkel waar mense hul handvaardighede kan bemark.
“Ons moet iets volhoubaar in die dorp op die been bring, want die meeste tuisnyweraars is afhanklik van die mark as hul enigste inkomste. Hulle het deur die winter ook daardie inkomste nodig,” sê sy.
Ongelukkig is daar op Kleinmond nie groot genoeg binnespasie om ‘n mark op Saterdag en Sondag te hou nie: Die stadsaal en gemeenskapsaal word reeds deur kerke gebruik, en dit moet so bly, voel sy.
Sy glo as mense saamstaan kan enigiets bereik word. ‘n Winkel wat vyf dae per week oop is, sal die mense se inkomstepotensiaal vergroot. Dit moet net volhoubaar wees om regtig ‘n verskil te maak.
Nydia sien die winkel as ‘n oplossing vir die groot probleem van werkloosheid en armoede in die dorp. Ook om ‘n spasie te bied vir mense wat nie self ‘n winkel kan bekostig nie. Dit bied ook ‘n oplossing vir bejaardes wat nie die hele dag by ‘n mark kan sit om hul ware te verkoop nie. “Hulle huur rakspasie en kan dan tuis bly om nog produkte te vervaardig terwyl ons die verkoopwerk vir hulle doen. Aan die einde van elke maand kry hulle hul geldjie.
“Terwyl ‘n mens hande het, kan jy altyd brood op die tafel bring. Kom ons gaan terug na die ou waardes om geld te verdien – met jou hande,” sê sy.
Daar is nog nie ‘n naam vir die winkel nie, maar sy weet dit sal mettertyd in haar hart vorm aanneem, want dit moet iets wees om haar ma, Tula Carelse, se nagedagtenis te eer.
As die winkel aan die gang is, het sy planne om baie wyd bemarking te doen en uiteindelik kan hulle aanlyn gaan en aflewerings begin doen, wat ‘n nog groter finansiële voordeel vir die handvaardiges beteken.
Intussen is Nydia op soek na ongebruikte rakke of planke, wat hulle sal opdollie om rakspasie te kan voorsien. Kontak haar by 072 935 1616 of myafricangypsy@gmail.om.
