KLEINMOND – Overstrand se burgemeester, Dr Annelie Rabie het vanmiddag (Donderdag) ‘n persverklaring uitgereik rondom die ondersoek na die skietdood van Brutus, ‘n bobbejaanmannetjie van die Bettysbaai trop. Die plan was om ‘n tweede lykskouing te doen om oorblywende stukkies windbukskoeël uit Brutus te haal, soos die Herald Dinsdag reeds berig het.
Dit kon egter nie gebeur nie, omdat daar ‘n misverstand by die krematorium was. Een van die werkers het Brutus glo in weerwil van ‘n opdrag veras. Die werknemer gaan nou glo dissipliner verhoor word. Die hele gedoente het ‘n spektakel geword.
Laat ek begin deur te sê ek dink ook dat die persoon wat Brutus geskiet het, vervolg behoort te word. Dit is egter hoogs onwaarskynlik dat dit ooit gaan gebeur, tensy daar ‘n getuie was wat die persoon sien skiet het. Na die beste van my wete is daar nie so ‘n getuie nie.
Verder gaan dit bitter moeilik, in alle waarskynlikheid onmoontlik wees, om die stukkies fragmente wat in Brutus gekry is, te verbind met ‘n spesifieke vuurwapen. Onthou dit is stukkies lood wat afgevuur is deur ‘n windbuks, nie koeels deur ‘n vuurwapen soos ‘n pistool of geweer nie. As dit die geval was, sou jy dit natuurlik wel kon doen.
Daarby is daar ‘n groot agterstand by ons laboratoriums. Die eenvoudige waarheid is dat daar feitlik geen kans op ‘n suksesvolle vervolging van die skuldige is nie. Ons vermors tyd en geld op iets wat niks gaan oplewer nie.
Die gevoel wat ek kry is dat die munisipaliteit sou verkies om nie die HWS-kontrak te hernu nie. Dis ‘n hele klomp geld wat hulle op ander manière sou kon gebruik. Die vraag is natuurlik wat dan? Dit is iets waaroor ons as gemeenskap behoort te praat, soos Fanie Krige in Donderdag se Herald gevra het.
Ons gaan saam die een of ander, min of meer houdbare situasie moet vind. Hierdie voortdurende konflik oor die bobbejane het ‘n baie negatiewe uitwerking op ons gemeenskappe en het mense in kampe verdeel. In die proses word ander belangrike kwessies nie aangespreek nie.
Ons burgemeester het die situasie rondom die bobbejane aanvanklik baie goed hanteer. Na drie of vier maande is ons egter nog presies waar ons was. Trouens, ons is slegter af, want een van die sleutelfigure in die trop is doodgeskiet. Daar het ook nog niks gekom van Dr Rabie se beoogde omgewingsadvieskomitee nie. Hoe gaan ons die kwessie aanspreek? ‘n Referendum dalk? redakteur@overstrandherald.co.za
