KLEINMOND – De Wet Hugo, plaaslike skrywer van jeugboeke wat al vir 12 Jaar in Jedda, Saoedi-Arabië skoolhou, het dit nou reggekry om sy Saoedi-leerlinge vanjaar voor te stel aan boeke deur twee Suid-Afrikaanse skrywers: Jaco Jacobs se boek: A good day for climbing trees en Journey to Jo’burg van Beverley Naidoo. Die boeke sluit perfek aan by die jaar se kurrikulum.
De Wet Hugo se jongste boek, Katastrofe, word op 26 April by Bargain Books in Paarl bekendgestel. Daarmee saam is die Engelse vertaling: Catastrophy. Dis die eerste boek wat hy vir die ouderdomsgroep 6-9 jaar geskryf het. Dr Mia Oosthuizen, ‘n kinder- en jeugboekspesialis, sal by die geleentheid met De Wet in gesprek tree.
De Wet sê hy doen graag sy deel om die Suid-Afrikaanse boekemark te bevorder – selfs daar in die Midde-Ooste waar hy werk. “Ek sal natuurlik ook probeer om Catastrophy hier aan die kinders bekend gestel te kry en dit vir die skool te laat aankoop,” vertel hy per whatsapp. Die storie van Katastrofe het ‘n sterk boodskap oor bevooroordeeldheid of rassisme, wat op vermaaklike manier aan kinders oorgedra word. Dis ‘n belangrike boodskap vir die hele wêreld, waar bevooroordeeldheid maar oral op een of ander manier voorkom,” sê hy.
