KLEINMOND – Sit jy met jou hande in jou hare oor jou motorhuis wat so oorvol stoorgoed is dat jy skaars uit jou kar kan klim nadat jy hom ingetrek het? Bel net vir Warren van Heerden van Garage Rehab en hy en sy vrou, Joanita Esterhuyse sorteer die sakie vinnig vir jou uit.
“Ons doen die diens gratis indien ons die goedere wat die eienaars nie meer wil hê nie, kan hou. Anders, as ons net skoonmaak en regpak, werk ons vir ‘n fooi. Ons maak ons lewe daaruit om uitskot-items skoon te maak, te herstel, op te gradeer, seker te maak dat dit werk en dan te herverkoop,” sê Warren.
Warren is al van 6-jarige ouderdom hier op Kleinmond – hier skoolgegaan en alles. “Nou sit ons seun, Jacob, in dieselfde klasse waar ek skoolgegaan het,” glimlag hy. “Dis die ideale plek vir ‘n kind om groot te word. Jacob is ‘n regte waterhondjie en ons almal geniet die lagoon en die see.”
Warren was op ‘n stadium verfkontrakteur hier, toe is hy vir tien jaar Mosambiek toe, waar hy ‘n saagmeul bestuur het. Joanita het daar haar eie internasionale créche bedryf. Sy is ‘n Vrystater wat op Bethlehem grootgeword het. Haar ouers woon nou nog op Kroonstad.
“Maar nou is ons al vyf jaar terug op Kleinmond om hierdie diens aan die gemeenskap te lewer: vir afgetredenes wie se kinders oorsee is, bejaardes wat nie meer kans sien om swaar goed rond te dra nie, werkendes wat te besig is om self iets aan hierdie frustrasie te doen, mense wat verhuis, weduwees wat nie weet wat om met hul oorlede man se skatte te doen nie… noem maar op.”
Warren en Joanita sê hulle vind Garage Rehab baie vervullend. “Net om die verligting op die mense se gesigte te sien as ons klaar is, is al vir ons ‘n groot beloning. Dis nooit eentoning nie en mens doen nogal baie mensekennis op om te sien wat vir mense belangrik genoeg is om vir jare te bêre. Dis ook soms prettig: een kant gooi die tannie uit en agter haar rug ‘red’ die omie weer sy kleinode.
“Ons het getuigskrifte van kliënte wat baie gelukkig is met ons diens en sommiges het al ‘n paar keer na ons toe teruggekom,” vertel hulle.
Bel of whatsapp Warren by 072 690 3165 vir verdere inligting.
