KLEINMOND–Ingrid Taylor wat al bekendheid verwerf het vir haar fonds-insamelings en vrywillige werk by KAWS, het pas haar eie winkel vir dierespeelgoed en ander produkte in Hoofstraat 127 oopgemaak.
Sy het ‘n opedag op Saterdag 21 September ge-hou en kinders, honde en hul eienaars genooi om in die pret te kom deel. By elke transaksie van een van die interessante produkte het die koper ‘n heerlike boerierol as toegif gekry.
Buite is ‘n kleurvolle spring-kasteel opgeslaan, want TailWaggers is ook ‘n depot waar springkastele van Incredible Castles gehuur kan word. Daar is ‘n groot verskeidenheid om uit die katalogus te kies.
Nog ‘n vertakking van die besigheid is ‘n afsetpunt vir Bjorn Enslin se stoffeerwerk van Dream Drapery. Hy doen ook gordyne en blindings.
Ingrid woon al 25 jaar op Kleinmond en het vroeër ‘n boetiek asook Le Rêve Restaurant in Haweweg bedryf.
“Ek het nog altyd ‘n passie vir diere gehad. My seun, Damien Scanlen, werk oorsee en hy is die aankoper van die diereprodukte wat ons invoer. Ons het sowat agt maande gelede met die idee begin en ons koop net ses tot agt items van ‘n produk aan, om die voorraad eksklusief te hou. Ons kyk uit vir sterk en besonderse speelgoed, knus bedjies, harnasse, leibande en bakke – enigiets handigs, prettig of snaaks vir honde en katte,” glimlag sy.
“Ons wil graag baie dankie sê vir al die mense wat ons op ons opedag kom ondersteun het. Tot ons ‘n vaste winkelbestuurder aangestel het, kan kliënte ons bereik deur 076 512 2539 te skakel. Ons sal die winkel met graagte kom oopmaak.”
